Kohhran Chanchin Tawi

Mizo ziakmi zinga hriat lar ber pakhat Pu James Dokhuma chuan kum 1973 khan  Isua Krista Kohhran chanchin chu heti hian a ziak a, “Kohhran naupang tak, din chhuaktu mimal pawh awm chuang lo, rambuai harsatna leh manganna hrut vela awm te, thlarau lama mi lungleng eng kohhran mah bel duh lo, ram leh hnam, Politics leh Kohhran thu inremna lai taka hmet kawpa kalpui duhtute chuan Isua Krista Kohhran hi an din a ni” tiin Isua Krista Kohhran pianchhuah dan a tarlang a ni.

         Khawvel Kohhran pawl(denomination) hrang hrang te hi a lo pian dawnin sulsutu bik an awm thin a, dintu mihring hming chhal tur an nei deuh vek thin a ni. Nimahsela heng kohhran dinte hian Kohhran neitu Isua hming an chawi thin lo. Isua Krista Kohhran Mizorama lo ding erawh hi chuan dintu hming hmerha sawitur a nei ve lo a, a hun takah thlarau mite hmangin din a ni.(Ka hmingpu a piang te leh ka ropuina tura ka siam a piang te chu, an mahni chu ka din a, a ni, an mahni chu ka siam a ni __Isaia  43:7)

BC 4-na velah Lal Isua chu khawvelah a lo pianga, khawvelah kum thum chhung rawng a bawl laiin zirtirte zingah Amah zuitu Kohhran a din tur thu a sawi. AD 29-ah Kraws ah khenbeh niin a thi a, ni 3 hnuah tho lehin ni 40 chhung zirtirte bulah a awm hnuin vanah a chho ta nih kha. Isuain khawvel a chhuahsan atanga ni 50 naah Amah ringtute inkhawmah chuan thlarau thianghlim a lo thleng taa, hemi ni hi Penticost ni tih a ni ta a ni. Penticost ni atang hian Isua ringtu te chu nasa taka  pun belhin an awma, hemi ni hi khawvela Kohhran hmuh theiha a lo pian tanna nia ngaiih a ni.

Mizorama Isua Krista Kohhran lo ding hi pawl pakhat hminga lo zi-chhuak emaw 1971 kuma lo awm tir chauh emaw ti an awm thin a, protestant pakhat ve mai ang tein sawi a awm thin bawk, thenkhat chuan pawlchhuak ang tein min hre ve bawk a, mahse, thlarau thianghlim hriattirna tel lo a hmutute sawi dan hi a dik lo vek a ni. Heng zawng zawng hi Thlaurau thianghlim kal tlanga Pathian ruahmanna fel tak hmutu tan lo chuan hriatthiam theih harsa tak a ni ngei ang. Krista Isua khan he khawvelah a kohhran a din chhoh tur leh mitthi khaw kulh kawngkhar pawhin a ngam loh tur thu a sawi a nih kha. Ringtu hmasa te leh Tirhkoh Paula ngei pawhin lehkha a thawnin Isua Krista zuitu te chu Isua Krista hmingin chibai an inbuk thin tih kan hmu. Roman Catholic hmingin emaw Presbyterian hmingin emaw Baptist hmingin emaw Salvation hmingin emaw chibai an inbuk ngai lo. Isua kohhran bik hote chibai inbuk tawnna chu Isua Krista hming ngei a ni. Hei hian khawvel mihring dang te lak ata lakhran/kohhran bik an nihzia a tichiang hle a ni.

         Zawlnei ten Lal Isua pian tur thu hla tak atanga an lo hmu lawk a an lo puang lawk ang khan Isua Krista Kohhran lo piang tur hi a pian hma kum 40 vel daiha Zawlnei ten an lo puang lawk taawh a ni. A hnuaiah han en ila :

1.      Kum 1936, jan. ni 14 khan Tlangnuam,Aizawla cheng Pu Patlaia chuan “Kum 1971-ah Mizoramah Isua Krista Kohhran a lo piang ang” tiin a puanga. Isua Krista Kohhran din a nih tur thu puanchhuahna hmasa ber a ni.

2.      Kum 1949, Sept ni 22 khan Mamit khuaa cheng Presbyterian Pastor Pu Kawlthawma chuan Sabual ‘N’ khuaa a awm laiin “ Mizorama kohhran awm zawng zawng hian kross an tluksana, kohhran thar a lo piang anga, a hmingah Isua Krista Pathian Nung Kohhran tih a ni ang” tiin a lo puang lawk ve bawk.

3.      Kum 1966 khan Tirhkoh Nupuii chuan, “Isua Krista Kohhran ka hnam thlan te hnenah ka hming pu ka kohhran in ding tur a ni” tih thu chu thlarau hriattirna a dawng a. ‘’Mizoram leh Mizo hi Pathian zawn chhuah a ni a, Petera te hnena kohhran a ding ang khan in din ve tur a ni a, a hming chu Isua Krista Kohhran a ni tur a ni” tih thu hi rambuai hnu atang khan a tlangau pui ta reng bawk a ni. Tichuan Isua Krista Kohhran lo pianchhuah hma loh chu Mizoram hmun hrang hrangah kalin he thu hi a tlangaupui zel thin.

4.      Kum 1967 khan W. Phaileng khua Upa Chhunga hnenah hrilhlawkna “Kohhran   thar a piang ang’’ tih chu a thleng a ni.

ISUA KRISTA KOHHRAN LO PIANNA TURA PATHIAN HMANRUA TE :

         Kum 1936 daih tawha hrilhlawkna thleng tawh chu  a tak a lo lan chhuah theihna turin Pathianin ruahmanna fel tak a lo duang lawk sa diam mai hi a lo ni a, a hun takah Isua Krista Kohhran chu a lo pian chhuah theihnan Pathian hmanraw thenkhat tarlang ila :

         1) MIZORAM RAMBUAI :         Ni leh Thla kara leng inti thin hnam Mizo te chuan Vai awpna hnuaia awma , ngaihsakna tha dawng lo a an awm chu hrehawm antihna a zual ta hle maia. Mizoram leh Hnam hmangaihtu te chuan Mizo Cultural Society tih te, Mizo Nattional Famine Front tih te, a hnuah Mizo National Front tih te chu an din chho ta a. Sap leh Vai awpna hnuaia an awm hnu chuan Zalenna neih duhna a lo piang ta a, MNF chuan Mizoram Zalennan kum 1966 march ni 1 zanah India atanga Zalenna chu a puang ta a, Mizoram chu rambuai ah kan lut ta a ni.

         Mizoramah buai leh harsatna tam tak a lo thleng nasa ta hle mai a, Vai Sipai awpna hnuaiah chep tak leh hrehawm em em in an awm ta a ni.  Zawlnei Kapthangan kum 1964-ah Lalpa Aw hriain “ kan ram leh hnam tana tawngtai turin Lalpan min hriattir a ni” ati a, he hriattirna hi Kohhran lian awm ten an bengkhawn lem lo a, thlarau mi te erawhchu  ram leh hnam tan an tawngtai ta chuah chuah mai a ni. He hriattirna hi tun thlengin keini Isua Kista Kohhran pheichuan din a nih atangin kan la kal pui ta zel a nih hi.

         2) THLARAU THIANGHLIM ZALEN LOHNA :      Mizorama kristianna a lo luh atanga rei vak loha Khawvela hrarhna thlen angina Mizoramah pawh Thlarau lama harhna a lo thleng ve thin a. kum 1906 khan Harhna hmasa ber a lo thlenga, 1913 te 1919 te leh 1935 te chuan thupui bik neiin harhna vawii li lai mai a lo thleng a ni.         Rinna lama la naupang tak Mizo te hian Harhna kan tawh fo nachhan hi thenkhat chuan kan ram  leh hnamah hian Pathian Thlarau thianghlimin Lal ber nihna chan a duh a ni ang antih hi thil pawmawm tak a ni.

         Hetia thlarau thianghlimin kan ramah Lalber nihna chan a duh lai hian, Kohhran Pawl lian ber Presbyterian chuan a hrethiam vak ta lo a, kum 1949-ah pheichuan “harhna kaihhruaina bu” an siam ta hial a, Hemi avang hian thlarau mi te chuan hnawl leh endawng niin an inhriaa, nekchep leh hnawh chhuahin an awma, an mangang thin hle a ni. Thlarau mi te chuan khuang vuain lamin Pathian an fak thina, mahse hei tak hi Missionary lo kal hmasa te khan Khuang leh Mizo hnam thil tih thin chu ramhuai biakna thil ni a ngaiin an hnawl veka, Harhna lo thleng hrang hrangah pawh khuanga hmanga lam chak thin hle mah se khap a ni. Amaherawhchu, kum 1919 harhna lo thlen khan khuang chu hman a ni nasa ta deuh a, Khuang nena Pathian fakna hun hmasa ber ni a hriat a ni bawka. Prebyterian Kohhran hmunpui ber Mission vengah pheichuan kum 1964 chho velah pawh khuang hi lak luh an la remti lo a ni. Hetih hunlai vel hian mihlim kan tih mai, thlarau mi deuh deuh khuang nena zaia lam thin te pawh an chep ta riau mai a, kohhran thenkhatah chuan mi hlim lam nain hmun a chang lo va, thlarau hnathawh pakhat hlim lamna leh tawnghriatloh lam tihnepna tur ang zawngin khuang hnih hman an khap hial a ni . Zaa za Kristian awmna ram tia chhal chu lungngaihnain a tuam vel ta mup mup mai a ni.

ISUA KRISTA KOHHRAN A PIANG TA :

         A chunga kan tarlan tak chhan hrang hrang heng thil lo thleng zawng zawng hi thlarau thianghlim nekchepna avanga ram bawhchhiatnaah ngaiin tlang hrang hrangah mihlim leh thlarau mi leh zawlnei te chu  ram leh hnam tan an tawngtai ta chuah chuah mai a ni. Hetia mizorama Kohhran pawl lian ber teah thlarau thianghlimin hmun a chan tak loah chuan Thalrau mi vakvai te chu Boys Middle School(sikul sen) Aizawla Sikulpui kawnah Pathianni tlai tin an kal khawm thin a, Pathian fak leh lamin tawngtaina nen an zaikhawm mup mup thin.

         A hmalama kan tarlan tawh ang khan hetih hunlai vel hian kum tam lama hrilhlawkna thleng te chu a tak ngeiin a lo thleng tawh dawn nia ringtu tam tak an awm a, Tirhkoh Nupuii ngei pawhin Mizoram hmun hrang hranga a vah velnaah Isua Krista Kohhran din a tul tawhzia te a sawi bawk thin tih kan tarlan tawh kha. Khaw thenkhatah pheichuan Kohhran chu an din hial tawh a ni.

         Mizoram buai avanga Ram leh Hnam tana tawngtai rualna kalpui vel boruak leh Thlarau mi ten Lalpa au chunga nekchep nia an inhriatna lak ata inla hranga inkhawmna an neih thin chuan ram a la zau zela.  Kum 1971 April ni 4, Bethel Ni hmangin Zoram pum huap thlarau mite inkhawmpui chu Pachhunga Memorial College(tuna Pachhunga University College) Aizawlah chuan neih a ni a, inkhawmpui thupui atan pawh “Thlarau mite inpumkhatna’’  tih a ni. Hemi tuk April ni 5 hian Krishna Talkies Cinema Hall(Zodin Cinema Hall ni zui ta) ah chuan tawngtaihona neiin Kohhran thar din a hnu leh hun loh sawiho a ni a. ‘Kohhran din a hun tawh’ ti pawl leh ‘a hun a la ni lo’ tipawl an awm nuk tak mai si ah chuan Thlarau mite zinga Kohhran din a tul tawh a ni tipawl chu Aizawl Venghluia Pu K. Lalluta in ah an kal khawm leh taa, April ni 6, 1971 tlai dar 3-ah chuan kum 40 vel liam taa hrilhlawkna chu ataka lo changing Isua Krista Kohhran chu a hming atan ‘Kohhran Thar’ tiin Mizoramah Pathianin Tlarau thianghlim zalenna leh ram leh hnam damnan a lo piang ta ni.

         He kohhran thar hming atan hian October ni 5, 1971 khan thlarau thianghlim ruatlawk tawh ang ngeiin lungrual takin ISUA KRISTA KOHHRAN tih chu an lo pawm ta bawk a ni.

         Isua Krista Kohhran pian hunlai hian Mizoram hmun hrang hranga khaw 12 -1).Farkawn 2)Dulte 3)Vaphai 4)Mamit 5)W.Phaileng 6)Lengpui 7)Reiek 8)Chhingchhip 9)Venghlui 10)Luangmual 11)Hnahthial leh 12)Durtlang)-ah Isua Krista Kohhran a ding fel ve nghal tih hriat a ni a, hemi hma hian khaw 7-ah a lo ding tawh bawk a ni .

ISUA KRISTA KOHHRAN RAM ZAU CHAK DAN :

         Kohhran anga a din tan tirh phat atangin Isua Krista Kohhran hian member lamah punna nasa takin a nei a, a hunlaia kohhran pung chak ber a ni. Pathian mi zawlnei ten “Mizorama Kohhran lian ber a la ni ang” tia an lo puan lawk tawh ang ngeiin Mizoramah pawh member tam ber nihna kawng pan chho zelin Kohhran buai hma thleng khan Mizorama Kohhran member tam ber 3-na  a ni ta reng a.

Kum 1973 October thla vel atang khan kohhran rawngbawlna, FANGRUAL tih chu Mizoram kil tinah kal member lakluhnaah pwimawh tak a ni. An pawl hi Evan. Lalzidinga a kaihruai a ni. Kum 1980 vel atang khan Volunteer For Christ(VFC) Team chu Evan. C Lalngurliana kaihhruaiin Mizoram dung leh vangah zai leh thusawia rawngbawlna an neia , an ni pawh hi kohhran member sengkhawm kawnga hmalatu pawimawh tak an ni.

         Kohhran din a nih atanga kum hnihna lekah pawh Isua Krista Kohhran member zat chu mi 15,000 vel niin Pu James Dokhuma chuan a ziak.

Kum 1989-a “Kohhran chanchin” tih ziaktu Pu Liandawla chuan Isua Krista Kohhran member zat chu mi 36,000 angin a ziak a(hetih laia Mizoram population chu nuai 6 vel a ni). A hunlaia Mizoram mihring zat ngaihtuahin member thahnem tak a ni.

TLIPNA :

         Khawvel pawl lian zawk tam tak awm hnu leh Kan rama cheng zawng zawng te krista ringtu kan nih tawh hnu a Pathianin Isua Krista Kohhran a lo din chho ta mai hi chik taka kan ngaihtuah chuan Pathian atanga chhuak mawhphurhna lian tak a keng tel tih hai rual a ni awm lo e. Mimal phur thuta din emaw mi tute emaw kal khawma din tawp a ni lo a, zawlnei te kal tlangin thlarau thianghlimin din a nih hma kum 40 velah Isua Krista Kohhran chu a lo pian tur thu an sawi lawk a ni. He hrilhlawkna lo thleng dik tur hian Mizoramin hun inthlakthleng nasa tak a tawk chho mawlh mawlha, mahse Pathian remruat chu dan zawh rual a nih loh avangin thu chu tisaah a lo chang ta ngei a ni.

         Pathianin mi a koh hran te chu a hmaa an awmna atangin emaw an nun hlui atangin emaw la hrangin Ama tan a buatsaih thin tih chu a kohhran bik – Abrahama te, Josepa te, Mosia te leh Davida te nunah chiang takin kan hmu thei a ni. Tirhkoh Paula ngei pawh Pathiain a lakhran chin ata chu mithar a ni a, a bul vela mite angin a awm thei tawh lo a ni tih kan hmu. Heta lak hran tih hi Pathianin a mi te a kohhran bikna thu nen awmze kawh tum thuhmun nei a nihzia kan hmu thei ang. Pawl(denomination) hrang hrang lo ding ve te hi Mizo tawnga Kohhran kan tih nen a danglamna kan hriatthiam a pawi mawh hle mai.

         Isua Krista Kohhran ngei pawh hi Pathianin ruahmanna fel tak leh tum bik thil neia a din a ni a, A hunlaia thlarau zalen lohna lak ata thlarau hnathawh humhalh tur leh mizo mipuite lungngaihna nasa tak kara hnemtu tura a ruahman a ni. Hun rei lo te chhung Pathian duh dana a kal chhungin hmasawnna nasa tak a hmu bawk. Mahse, thlarau nazawng ringtu an lo chhuah atang leh sual setana beihna a hneh zawh loh avangin nasa taka hnuh hniamin a awm meka, Mizoram kohhran lian ber ni tura Pathian ruatlawk kha tunah chuan uihum zat lek kan ni ta, sual sima Pathian duhzawng zawna, thlarau thianghlim duh  ang taka kan inlam let leh a nih chuan Pathianin kan tan hun tha tak a la dah ngei ang. A hming ropui tak timawizualtu atan min la hmang leh duh reng a ni tih hi hria ila, Krista leh A kohhran tan bang lovin theih tawpin I thawk zel ang u. Lalpan Malsawm rawh se ! Amen !